لندن (پریس ریلیز)ہائی کمشنر ڈاکٹر محمد فیصل نے برٹش پاکستانی طالبہ ماہ نور چیمہ کو جنرل سرٹیفکیٹ آف سیکنڈری ایجوکیشن (GCSE جی سی ایس ای) کے امتحان میں تاریخی کامیابی حاصل کرنے پرتعریفی سرٹیفیکیٹ سے نوازا۔ ماہ نور نے جی سی ایس ای کے 34 مضامین میں اعلیٰ درجات کے ساتھ پاس کرنے کی غیر معمولی کامیابی نے ایک بین الاقوامی ریکارڈ قائم کیا ہے۔
ہائی کمشنر نے ماہ نور کی اعلی تعلیمی کامیابی پرتعریف کا اظہار کرتے ہوئے اسے دنیا بھر کی نوجوان لڑکیوں کے لیے ایک مشعل راہ قرار دیا۔ انہوں نے ماہ نور کو نہ صرف اپنے خاندان کے لیے عزت بخشنے بلکہ عالمی سطح پر پاکستانیوں کی غیر معمولی تعلیمی صلاحیتوں کو اُجاگر کرنےکے لیے بھی سراہا۔ ڈاکٹرمحمد فیصل نے ماہ نور کو تعلیمی میدان میں بہترین کارکردگی کے حصول کے لیے نیک تمناؤں کا اظہار کیا۔
ڈاکٹر فیصل نے ماہ نور کے والدین کو مبارکباد دی اور اُنہیں اپنی بیٹی کی بھر پور مدد اور رہنمائی کے لیے بھی تعریف کی۔ انہوں نے تعلیمی کامیابی کے لیے سازگار ماحول کو فروغ دینے میں ان کے اہم کردار کا اعتراف کیا اور اعلیٰ کامیابی حاصل کرنے کیلئے بچوں کی پرورش میں والدین کی حوصلہ افزائی کی اہمیت پر زور دیا۔
ہائی کمشنر نے کہا کہ ماہ نور چیمہ کی جی سی ایس ای امتحانات میں شاندار کامیابی برطانیہ اور پاکستان کے درمیان تعلیمی تعلقات کو مزید مضبوط کرے گی۔
