اسرائیلافغانستانانصافبرطانیہبھارتپاکستانپشاورچیندفاعکراچیکشمیرلاہورمعیشت

نادرا میں آئی ڈی کارڈ کے سسٹم کی پالیسیوں کو مزید بہتر بنائیں گے، شیخ رشید

ہاں


6 آراء

وفاقی وزیر داخلہ شیخ رشید کا کہنا ہے کہ حکومت، نیشنل ڈیٹا بیس اینڈ رجسٹریشن اتھارٹی (نادرا) میں تصحیح، تصدیق اور تجدید کا نیا نظام لارہی ہے۔

اسلام آباد میں میڈیا سے گفتگو کرتے ہوئے ان کا کہنا تھا کہ ’840 شناختی کارڈز، جنہیں وزیروں نے انتخابات میں ریلیز کرایا تھا ان سب کو مسترد کرنے کے احکامات جاری کردیے ہیں‘۔

ان کا کہنا تھا کہ نادرا میں پالیسی لائیں گے کہ انگوٹھے کے نشانوں سے آئی ڈی کارڈ کے سسٹم کو بحال رکھا جائے۔

انہوں نے کہا کہ ’تصدیق، تجدید اور تصحیح کی نئی پالیسی لارہے ہیں، جو کارڈ مشکوک ہوں گے انہیں پیغامات بھیجیں گے اور وہ انٹرنیٹ کے ذریعے اس کا جواب دیں گے تاکہ ہم دیکھ سکیں کہ کوئی غیر ذمہ دار شخص پاکستان کے شناختی کارڈ سے فائدہ تو نہیں اٹھارہا‘۔

انہوں نے کہا کہ ’پاکستان میں بغیر ویزا کے سالوں سے مقیم لوگوں کو 14 اگست تک کا وقت دیتا ہوں کہ وہ پاکستان چھوڑدیں یا ویزا کے لیے درخواست دے دیں تو ان کے جرمانے کی فیس معاف کردوں گا‘۔

ان کا کہنا تھا کہ نادرا کو قومی توقعات کے عین مطابق بنانے کے لیے نئے چیئرمین نے عہدہ سنبھالا ہے اور وفاقی تحقیقاتی ایجنسی (ایف آئی اے) کے سائبر کرائم ونگ کو بھی مزید ترقی دینا چاہتے ہیں۔

انہوں نے کہا کہ ’پاکستان کے خلاف بھارت اور اسرائیل نے ہائبرڈ وار کا آغاز کردیا ہے، یہ نادرا کو مشکوک بنانا چاہتے ہیں اور اس کی سوشل میڈیا پر مہم چلارہے ہیں‘۔

’سندھ میں حکومت بنانے کی کوشش کریں گے‘

وزیر داخلہ کا کہنا تھا کہ آئندہ انتخابات میں بھی پوری کوشش ہوگی کہ تحریک انصاف آئندہ انتخابات میں سندھ میں بھی حکومت بنائے۔

پاکستان مسلم لیگ (ن) کے سربراہ نواز شریف پر تنقید کرتے ہوئے ان کا کہنا تھا کہ ’ان کا ایک ہی ایجنڈا ہے، اینٹی آرمی، اینٹی اسٹیبلشمنٹ اور اینٹی عمران خان، وہ اس ایجنڈے پر کسی بھی حد تک جانے کو تیار ہیں جس کے لیے انہوں نے حمداللہ محب سے ملاقات کی اور پھر اس کا دفاع بھی کیا‘۔

ان کا کہنا تھا کہ ’وہ مودی، جندال کے ساتھ پگڑیاں بدلتے ہیں، ان کی کوشش ہوتی ہے کہ فیٹف میں پاکستان پھنسا رہے اور انہیں تکلیف ہوتی ہے کہ عمران خان معیشت کو کیسے باہر لے کر آگیا ہے‘۔

انہوں نے کہا کہ ’نواز شریف نے کہا کہ وہ بڑی تکلیف میں ہیں، ہم ان کی مدد کرنے کو تیار ہیں، وہ پاکستان آنا چاہیں تو فی الفور انہیں چارٹر طیارہ دیا جاسکتا ہے‘۔

وزیر داخلہ کا کہنا تھا کہ ’ہم چاہتے ہیں کہ وہ پاکستان آئیں اور اپنے کیسز کا سامنا کریں، کمپنی کی مشہوری کے لیے وہاں سے ریاست مخالف تقریریں نہ کریں’۔

’2023 کے انتخابات کے بعد بھی یہ رونا دھونا کریں گے‘

ان کا کہنا تھا کہ پہلے ہی کہہ دیا تھا کہ یہ انتخابات ہارنے کے بعد رونا دھونا کریں گے، یقین سے کہتا ہوں کہ 2023 کے انتخابات ہارنے کے بعد بھی یہ یہی کریں گے۔

انہوں نے کہا کہ عمران خان کو اللہ نے فتح دی ہے اور کشمیریوں نے اعتماد کا اظہار کیا ہے۔

افغان فوجی اہلکاروں کی ملک میں آمد کے حوالے سے بات کرتے ہوئے ان کا کہنا تھا کہ ’ملک میں آنے والے 46 افغان فوجی اہلکاروں کو ایک یا دو روز میں باعزت طریقے سے واپس کردیا جائے گا‘۔

انہوں نے کہا کہ ’14 اگست تک افغانستان کی سرحد کے ساتھ باڑ لگانے کا کام مکمل ہوجائے گا‘۔

’نور مقدم کیس کے ملزم کا نام ای سی ایل میں ڈالیں گے‘

نور مقدم کیس کے حوالے سے بات کرتے ہوئے ان کا کہنا تھا کہ نور مقدم کیس کے ملزم کو بلیک لسٹ میں ڈال دیا ہے اور رواں ہفتے ای سی ایل میں نام ڈالنے کے لیے سمری بھیج دی جائے گی۔

ان کا کہنا تھا کہ اس کیس میں کسی قسم کی کوئی رعایت نہیں برتی جائے گی، کاش اس ملک میں ایسا نظام کرپٹ اور قتل کے مجرمان کو جلد از جلد پھانسی دی جاسکے۔

انہوں نے کہا کہ ’میری خواہش ہے کہ چین کی طرح کا یہاں نظام ہو کہ قاتل اور کرپٹ لوگوں کو موقع پر ہی سزا دی جائے‘۔

وزیر داخلہ کا کہنا تھا کہ ’پولیس جتنی تحقیقات کرسکتی ہے، کر رہی ہے، کسی کے ساتھ رعایت نہیں برتی جارہی تاہم جب عدالتوں میں جاتے ہیں تو کافی مسائل پیدا ہوتے ہیں، یقین رکھیں کسی سے کوئی رعایت نہیں برتی جائے گی‘۔

’جلسے بڑے ہونے سے ووٹ بڑے نہیں ہوتے‘

آزاد کشمیر میں تحریک انصاف کی حکومت کے قیام کے حوالے سے ان کا کہنا تھا کہ وہاں پی ٹی آئی کی حکومت بنی ہے، وہ کہتے تھے کہ ان کے جلسے بڑے تھے، جلسے تو مذہبی جماعتوں کے بھی ان سے بہت بڑے ہوتے ہیں۔

ان کا کہنا تھا کہ ’یہ کہنا کہ ہمارے جلسے بڑے تھے اس لیے ووٹ بڑے ہوں گے، ایسا نہیں ہے، جلسے کامیابی کی ضمانت ہوتے تو بہت سے لوگ ہیں جن کے جلسے ایسے ہوتے تھے کہ صبح ہوجاتی تھی مگر لوگ انہیں ووٹ نہیں دیتے تھے‘۔

انہوں نے کہا کہ ’آزاد کشمیر میں گجر ہیں، راجپوت ہیں، آرائیں ہیں، شیخ ہیں، یہ قبائلی نظام پر بھی اُمیدواروں کا فیصلہ تھا‘۔

آخر میں انہوں نے اعلان کیا کہ ’ہوسکتا ہے 28 جولائی کو سیاچن جاؤں، وہاں فوجی جوانوں کے ساتھ وقت گزاروں گا‘۔

آزاد کشمیر انتخابات: راولپنڈی میں کیش گروپ ہار گیا، عمران خان جیت گیا، شیخ رشید

وفاقی وزیر داخلہ شیخ رشید احمد نے آزاد جموں و کشمیر میں پاکستان تحریک انصاف (پی ٹی آئی) کی حکومت بننے کی پیش گوئی کرتے ہوئے کہا کہ راولپنڈی میں کیش گروپ ہار گیا اور عمران خان جیت گیا ہے۔

راولپنڈی میں اپنی رہائش گاہ لال حویلی کے باہر پاکستان تحریک انصاف (پی ٹی آئی) کے کارکنوں سے خطاب کرتے ہوئے وفاقی وزیر داخلہ شیخ رشید احمد نے کہا کہ عمران خان پاکستان میں دنیا کے سب سے اہم کام کرنے جا رہے ہیں، وہ داسو اور بھاشا ڈیم ہیں۔

انہوں نے کہا کہ یہ ڈیم 5 نہیں 10 ہزار میگاواٹ بجلی کا اضافہ کریں گے اور پاکستان کی تاریخ بدل دے گا۔

شیخ رشید نے کہا کہ ہمارے تین سال پورے ہورہے ہیں اور دو سال رہتے ہیں اور ہمیں ایک سال خدمت کرنی ہے، میں آپ سے وعدہ کرتا ہوں کہ کراچی سے جعلی شناختی کارڈ بنانے والے 19 لوگ نکالے ہیں، جو افغان جعلی کارڈ بناتے تھے، اسی طرح پنڈی، لاہور اور پشاور سے بھی نکالوں گا۔

ان کا کہنا تھا کہ پنڈی کے لوگوں، میں آپ کو یقین دلاتا ہوں، ہم شرافت اور احترام کی سیاست کرتے ہیں اور پنڈی شہر نے ثابت کردیا ہے کہ وہ عمران خان کے ساتھ ہے۔

انہوں نے کہا کہ ویلی کی نشستوں پر جو کچھ پیسے خرچ ہوئے اس کا ذکر نہیں کرنا چاہتا، میں اس لیے ذکر نہیں کرنا چاہتا کہ جمہوریت کی توہین ہے لیکن ان نشستوں پر ایسا ہی ہوا ہے۔

وزیر داخلہ نے کہا کہ عمران خان پاکستان میں مشین کے الیکشن کی بات اسی لیے کرتا ہے تاکہ کسی کو شک نہ ہو اور میں سارے کشمیریوں کو کہتا ہوں کہ عمران خان، کشمیر کی آزادی کا کیس لڑے گا اور ساری دنیا میں ڈنکا بجائے گا۔

انہوں نے کہا کہ کشمیر کے انتخابات نمیں پی ٹی آئی راولپنڈی میں پہلی مرتبہ جیتی ہے، اس سے پہلے کبھی نہیں جیتی تھی اور ایک غریب آدمی کے ساتھ جیتی ہے۔

وزیرداخلہ نے کہا کہ اگر ضرورت پڑی تو میں 9 بجے پھر خطاب کرسکتا ہوں، ابھی تو میں راولپنڈی کو مبارک باد دیتا ہوں کہ کیش گروپ ہار گیا ہے اور عمران خان جیت گیا ہے۔

ان کا کہنا تھا کہ کیش گروپ ہار گیا ہے، جنہوں نے لوگوں کے ضمیر خریدے، پیسوں سے لوگوں کے ووٹ خریدے اور شناختی کارڈ رکھے، ہم اس شہر کو بہتری کی طرف لے کر جائیں گے۔

شیخ رشید نے کہا کہ اگر ضرورت پیش آئی تو میں 9 بج کر 30 منٹ پر کشمیر میں پی ٹی آئی اور عمران خان کی مکمل حکومت بننے کا اعلان کروں گا۔

انہوں نے کہا کہ کابل اور لندن میں میرے خلاف مظاہرے ہو رہے ہیں، بیٹیاں سانجھی ہوتی ہیں لیکن پاکستان پر نام آرہا تھا کہ ہمارے ہاں امن وامان نہیں ہے، یہ اسلام آباد ہے جہاں 4 ٹیکسیاں بدلی ہیں تو پھر بھی ہم پہنچے ہیں۔

ان کا کہنا تھا کہ ایک بچی جو قتل ہوئی ہے، ان کے قاتلوں کو نہیں چھوڑیں گے، اور آج میں اعلان کرتا ہوں کہ وزارت داخلہ سارے پاکستان میں منشیات کے خلاف جہاد کرے گی، سارے پاکستان میں جتنی منشیات ہیں، اس کے خلاف وزارت داخلہ جہاد کرے گی۔

وفاقی وزیر داخلہ نے کہا کہ میں عمران خان، پی ٹی آئی اور رکشہ ڈرائیور کو مبارک باد پیش کرتا ہوں کہ عمران خان راولپنڈی میں جیت گیا ہے۔

شیخ رشید نے کہا کہ کل میں نے لاہور میں کہا تھا لیکن لوگوں کا خیال تھا کہ میں ویسے ہی پیشن گوئیاں کرتا ہوں، میں اندر سے آدھا ولی ہوں، یہ لال حویلی کے جنات اللہ کے بعد میرے ساتھ کھڑے ہوتے ہیں۔

خیال رہے کہ آزاد جموں و کشمیر میں عام انتخابات کے لیے ووٹنگ کا عمل مکمل ہونے کے بعد ووٹوں کی گنتی جاری ہے جہاں تاحال حتمی نتائج سامنے نہیں آئے۔

منبع: ڈان نیوز

مزید دکھائیے

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

متعلقہ خبریں

Back to top button

اپنا ایڈ بلاکر تو بند کر دیں

آواز ، آزادی صحافت کی تحریک کا نام ہے جو حکومتوں کی مالی مدد کے بغیر خالص عوامی مفادات کی خاطر معیاری صحافتیاقدار کی ترویج کرتا ہے اپنے پسندیدہ صحافیوں کی مدد کے لئے آواز کو اپنے ایڈ بلوکر سے ہٹا دیں