ریاض(ایچ آراین ڈبلیو)سعودی عرب نے غیر ملکی عازمین کے لیے عمرہ ادائیگی کی شرائط جاری کردیں۔ایک نجی ٹی وی کی رپورٹ کے مطابق سعودی عرب کے وزارتِ حج و عمرہ کی جانب سے غیر ملکی زائرین کو یکم محرم الحرام 1443 ہجری سے عمرہ فلائٹ کھولنے کا اعلان کیا گیا، جس کا باقاعدہ نوٹی فکیشن بھی جاری کیا گیا ہے۔نوٹی فکیشن کے مطابق 9 ممالک کے علاوہ دنیا کے دیگر ممالک کے زائرین کو عمرہ ادا کرنے کی مشروط اجازت ہوگی۔سعودی عرب کی جانب سے جن ممالک کے عازمین پر عمرہ ادائیگی کی پابندی عائد کی گئی، اُن میں پاکستان، بھارت، انڈونیشیا، مصر ترکی، ارجنٹائن، برازیل، جنوبی افریقہ اور لبنان شامل ہیں۔
