اسلام ٹائمز۔ پاکستان کے ایک معروف قومی خبرنامے کے مطابق گذشتہ دنوں پاک افغان بارڈر بندش کے باوجود 30 زخمی افراد کو علاج معالجے کیلئے افغانستان سے بلوچستان کے صوبائی دارالحکومت کوئٹہ لانے کی اجازت دے دی گئی۔ تفصیلات کے مطابق چمن بارڈر کے ذریعے افغانستان سے دو لاشیں اور 30 زخمیوں کو کوئٹہ کے نجی ہسپتال میں علاج کیلئے لایا گیا۔ مزید بتایا گیا ہے کہ جن افراد کی لاشیں لائی گئی ہیں، ان کا تعلق چمن سے ہے۔ لاشیں ان کے گھر والوں کے حوالے کر دی گئی ہیں۔ دوسری جانب صوبائی حکومت اور انتظامیہ کی جانب سے اس بات کی تصدیق نہیں ہوئی ہے کہ یہ لاشیں کن لوگوں کی تھیں اور زخمی ہونے والے افراد کون ہیں۔ صوبائی حکومت یہ بتانے سے بھی قاصر ہے کہ یہ افراد افغانستان میں کیسے زخمی ہوئے۔
